Молитвы перед иконой Пресвятой Богородицы «Феодоровская»

До сих пор

нет окончательного сформированного мнения касательно происхождения иконы.

Нынешние списки

относятся к иконографическому типу – умиление.

Святой образ является покровителем женщин,

поэтому Богородице, изображенной на иконе, молятся о рождении ребенка даже при бесплодии.

При чтении первой молитвы Феодоровской Божьей матери о зачатии через Богородицу обращаются к Христу.

О, Пресвятая Владычице Богородице и Приснодево, Марие, единая надеждо нам грешным!

К Тебе прибегаем и Тебе молим, яко велие имаши дерз­новение пред рождшимся от Тебе по плоти Господем Богом и Спасителем нашим Иисусом Хрис­том.

Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но Матерними молении Твоими умоли Господа Бога,

да сподо­бит нас грешных и недостойных свободитися от грехов и страстей душевных и телесных, умрети миру и жити Ему единому по вся дни живота нашего.

О Пресвятая Владычице Богородице, путешествующим спутешествуй и ограждай и охраняй оныя, избави плененных от пленения, свободи страждущих от бед,

утеши сущих в пе­чали, скорбех и напастех, облегчи нищету и всяко злострадание телесное, и даруй всем вся потребная к животу, благочестию и жизни вре­менней.

Спаси, Владычице, вся страны и грады и сию страну и сей град, имже сия чудотворная и святая икона Твоя дадеся во утешение и ограж­дение, избави я от глада, губительства, труса, потопа, огня, меча, нашествия иноплеменных, междоусобныя брани, и отврати всякий гнев на ны праведно движимый.

Даруй нам время на покаяние и обращение, избави нас от внезапныя смерти, и во время исхода нашего предстани нам явлъшися, Дево Богородице, и избави нас от воздушных мытарств, князей века сего,

сподоби на Страшнем Судищи Христовем стати одесную, и соделай нас наследники вечных благ, да сла­вим вовеки великолепое имя Сына Твоего и Бога нашего со Безначальным Его Отцем и Святым и Благим и Животворящим Его Духом, ныне и присно и во веки веков.

Аминь.

О Премилосердая Госпоже, Царице Богородице, приими смиренное моление наше, и не отрини нас, Заступление и Прибежище наше,

и не возгнушайся нас, недостойных, но яко Милосердая, не престани молящи, Егоже родила еси, да да­рует нам прощение многих согрешений наших, да спасет нас имиже весть судьбами.

Помилуй нас, Владычице, помилуй нас, несть бо нам спасения от дел.

Темже верно вопием Ти: помилуй рабы Твоя, и неплодное сердце наше покажи плодонос­но благих дел.

Призри на нас недостойных.

Ты бо упование и покров наш, жизнь и свет сердцу нашему.

Яко Невечерний Свет от чрева Твоего воздвигшая, озари душу нашу, Чистая, и отжени всяку мглу сердца нашего.

Даруй нам умиление, покаяние и сокрушение сердечное.

Сподоби нас по вся дни живота нашего творити волю Сына Твоего и Бога нашего и во всем благоугождати Ему единому.

О Богомати, не престани молящиРождшагося от Тебе за вся притекающия с верою к сему чудотворному образу Твоему и подавай им скорую помощь и утешение в скорбех, и напастех, и злостраданиих, избави их от клеветы и злобы человеческия, от враг видимых и невидимых, и всякия нужды и печали.

Спаси отечество наше, град сей и вся грады и страны от всяких бед и нужд, и сотвори милостива нам быти Бога наше­го, отврати всякий гнев Его на ны движимый и избави ны от належащаго и праведнаго Его прещения.

О Боголюбивая Владычице, Ангелов украшение, мучеников славо и всех святых радосте, с ними моли Господа, да сподобит нас в покаянии скончати живота нашего течение.

В смерти же час, Пресвятая Дево, избави нас от власти бесовския и осуждения, и ответа, и страшнаго испытания, и мытарств горьких, и огня вечнаго,

да, сподобльшеся славнаго Царствия Божия, величаем Тя и славим воплощшагося от Тебе Христа Бога нашего, Емуже слава со Отцем и Святым Духом, ныне и присно и во веки веков.

Аминь.

К кому воззову, Владычице; к кому прибегну в печали моей; к кому при­внесу слезы и воздыхания моя, аще не к Тебе, Царице Небесе и земли.

Кто исторгнет мя из тины грехов и безза­коний, аще не Ты, о Мати Живота, Заступнице и Прибежище рода человеческаго.

Услыши стенание мое, утеши мя и помилуй в горести моей, защити в бедах и напастех, избави от озлоб­лении и скорбей и всяких недугов и болезней,

от враг видимых и неви­димых, умири вражду стужающих мне, да избавлен буду от клеветы и злобы человеческим;

такождь от своея ми плоти гнусных обычаев свободи мя.

Укрый мя под сению милости Твоя, да обрящу покой и радость и от грехов очищение.

Твоему Матернему заступлению себе вручаю:

буди мне Мати и Надежда, Покров и Помощь и Заступление, радость и утешение и скорая во всем Помощница.

О, чудная Владычице!

Всяк притекаяй к Тебе, без Твоея всесильныя помощи не отходит:

сего ради и аз недостойный к Тебе прибегаю, да из­бавлен буду от внезапныя и лютыя смерти, скрежета зубнаго и вечнаго мучения.

Небесное же Царствие получити сподоблюся и Тебе во умилении сердца реку:

радуйся, Мати Божия, Предстательнице и Заступнице наша усердная, во веки веков.

Аминь.

Пpише́ствием честны́я Твоея́ ико́ны, Богоотpокови́це, обpа́дованный днесь Богохpани́мый гpад Костpома́, я́коже дpе́вний Изpа́иль к киво́ту Заве́та, пpитека́ет ко изобpаже́нию лица́ Твоего́ и воплоти́вшагося от Тебе́ Бога на́шего, да Твои́м Ма́теpним к Нему́ пpедста́тельством пpи́сно хода́тайствуеши всем, под сень кpо́ва Твоего́ пpибега́ющим, миp и ве́лию ми́лость.

Пришествием чтимой Твоей иконы, Богоотроковица, обрадованный сегодня Богохранимый город Кострома, как древний Израиль к киоту Завета, приходит к изображению лица Твоего и воплотившегося от Тебя Бога нашего, да Твоим Материнским к Нему обращением всегда просишь для всех, под защиту покровительства Твоего прибегающих, мир и великую милость.

Днесь све́тло красу́ется преимени́тый град Кострома́ и вся Ру́сская страна́, созыва́ющи к весе́лию вся боголюби́выя наро́ды христиа́нския, на пресла́вное торжество́ Бо́жия Ма́тере, прише́ствия ра́ди чудотво́рнаго Ея́ и многоцеле́бнаго о́браза, днесь бо яви́ся нам пресве́тлое вели́кое со́лнце, прии́дите, вси Богоизбра́ннии лю́дие, но́вый Изра́иль, ко исто́чнику цельбоно́сному, источа́ет бо нам неоску́дныя ми́лости Пресвята́я Богоро́дица и избавля́ет вся гра́ды и страны́ христиа́нския невреди́мы от всех наве́т вра́жиих.

Но, о Всеми́лостивая Госпоже́, Де́во Богоро́дице, Влады́чице, спаси́ страну́ на́шу, и архиере́и, и вся лю́ди Твоего́ достоя́ния от всех бед по вели́цей Твое́й ми́лости, да зове́м Ти: ра́дуйся, Де́во, христиа́ном похвало́.

Сегодня радостно ликует знаменитый город Кострома и вся Российская страна, созывая к веселью все боголюбивые народы христианские на преславное торжество Божией Матери ради пришествия Ее чудотворного и многоцелебного образа: ибо в сей день явилось нам пресветлое великое солнце; придите, все богоизбранные люди, новый Израиль, ко источнику цельбоносному, ибо источает нам неоскудевающие милости Пресвятая Богородица и избавляет все города и страны христианские невредимыми от всех наветов вражьих.

Но, о Всемилостивая Госпожа, Дева Богородица, Владычица, спаси страну нашу, и архиереев, и всех людей Твоего удела от всех бед по великой Твоей милости, да взываем Тебе: «Радуйся, Дева, христиан похвала!»

Песнь 1. Ирмос

Отверзу уста моя и наполнятся Духа, и слово отрыгну Царице Матери, и явлюся светло торжествуя, и воспою радуяся тоя чудеса.

Запев: Пресвятая Госпоже Богородице, усльши молитву раб Своих, молящихся Тебе (поклон).

Отверзем уста человецы, и язык уясним в нарочитыи день праздника нашего, явления Божия Матере, чуднаго Ея образа пришествия. И воскликнем радующеся, воспевающе Ея преславная чудеса.

Запев. Отверзите врата душевная, и слухи разумныя, дщери российския, изыдите на сретение Божия Матере образа явление. Одевает бо нагия, и просвещает темныя, подавающи всем верным целебныя милости.

Слава. Отверзем сон лености, и греха тягость отложим. Очистивше совесть и ум, внидем во врата Иеросалима прекраснаго, церкви Божия, и узрим небесную зарю, чудную икону Божия Матере, всем подающи богатыя милости.

И ныне. Отверзи недра Своя Божия церкви, и восприими в сокровище всего света, зарю чудную, Божия Матере икону. Се бо созывает верныя, исцеляет болящия, и прогоняет от человек духи лукавыя, и творит верным преславная чудеса.

Катавасия: Спаси от бед рабы Своя, Богородице Дево, яко вси по Бозе к Тебе прибегаем, яко к нерушимей стене и заступлению (поклон). Господи помилуй (трижды с поклонами).

Песнь 3. Ирмос

Твоя певцы Богородице, живыи нетления источниче, лик себе совокупльши, духовен утверди, и в божественей Ти славе венцем славы сподоби.

Запев. Твоим певцем Богородице, милости Твоея даруй, сохраняя нас от всех бед и напастей, Твоими Матерними молитвами, к рождьшемуся из Тебе Христу Богу нашему, да спасет душа наша от всех навет вражиих, и подаст нам велию милость.

Запев. Чуднаго Своего образа явлением, Твоего образа пришествием Богородице Дево, всяческая радости исполнила еси, вышняя и нижняя Ты совокупила еси, Ангелом и человеком едина бысть Царица. Молим Ти ся прилежно, Владычице посети наша немощи. Исцели болезни душевныя же и телесныя.

Слава. Твой образ Богородице Дево, обновление наше прииде к нам, и свет истинныи явися нам, просвещая омраченныя, исцеляя болящия. И всем в нуждах скорая помощница и заступление, Ея же мы яко животу нашему ходатаицу, и твердое християном ограждение величаем.

И ныне. Твоего образа чудному явлению Владычице Богородице, удивишася костромстии жителие, видяще преславная и умилно облобызающе, созывающе вся роды христианския. Приидите богоизбраннии людие, духовно возвеселитеся, поюще Христа Бога даровавшего нам таковое многоценное сокровище, християнское твердое ограждение. Катавасия.

Слава, и ныне. Седален, глас 3-й. Сшедыи с Небесе Исусе добрыи Пастырю, Христе Боже наш, на взыскание нас заблуждьших. Днесь же явил еси нам, чудную икону Матере Своея образ. Ея дивным пришествием, вся люди Своя возвеселила еси, яко твердое оружие на враги даровала еси, граду Твоему Костроме, и всей российской стране, великая похвала и утвержение.

Песнь 4. Ирмос

Седяи во славе на престоле божествене на облаце легце, прииде Исус Пребожественыи, от пречистыя Девы, и спасе же вопиющия, слава Христе силе Твоей.

Запев. Седяи во славе, хвалу приемлет от Ангел. Послал еси Господи к нам образ Матере Своея. Возвеселися днесь вся тварь, воздух же и море да кропят радость, яко пришествием премирным Царицына образа, преславно вси освятишася, подающи верным целебныя милости.

Запев. Сыи Владыко Человеколюбче, седяи на престоле высоце, благоволил еси явити пречестныи образ Матере Своея. Днесь да возвеселятся православных собори, еретическии же полк да посрамится, видящи поклоняемую верными. Прогоняет бо Та духи лукавыя, и подает болящим здравие, и душам нашим спасение.

Слава. Сему чудному Божия Матере образу, Ангельстии чинове раболепно служат, почитающе воспевают Тя, Царицу и Богородицу. Мы же како Тебе воспоем недостойнии, или кое Тебе принесем похваление, за многое Твое к нам милосердие. Яко явлением Твоего чуднаго образа, прииде вся озаряющи, и подающи всем разрешение.

И ныне. Сироты и вдовицы не плачите, радость ваша прииде днесь, мертвым живот восия, слепым свет облиста, немощным врачевство отверзеся, и всем верным спасение содеяся. Божия Матерь чуднаго образа явлением, подавает бо всем исцеление. Катавасия.

Песнь 5. Ирмос

Удивишася всяческая о божественей славе Твоей. Ты бо браконеискусимая Девице прият во утробе надо всеми сущаго Бога, и родила еси безлетнаго Сына, всем воспевающим Тя, мир подавающа.

Запев. Удивишася вся видимая и невидимая создания. Странствует ум человеческии, божественыя иконы чудному явлению. Источник бо животекущии явися нам, исцеления воды источающи Всенепорочная, и пристанище в лютых небурное, и всем в нуждах готовое спасение, печалным утешение.

Запев. Удивишася вся небесная воинства, радуют же ся христианския роды, возвеселишася преславному пришествию иконы Божия Матере. И Гавриилов глас восприимше вси. Радуися радости Ангелов и человеков, славящих Тя воистину, Ты бо радости ходатаица, и всем верным спасение.

Слава. Удивляет бо всяк град и страны, и ужасает новаго Израиля, народы российския, притекающия к Твоея милости, Дево Богородице. Очи сердец возпущающих Тебе Пречистая, не презри нашего воздыхания, с плачем Тебе вопиющия, и колени к земли преклоняющихся. Молим Ти ся Всепетая, буди нам всегда покров и помощница во веки.

И ныне. Удивися чертоже Божия Церкви святая, восприими и радуися со дщерьми российскими, Царицу Небесную, и всея вселенныя помощницу. Заступница бо наша прииде к нам, дивным явлением Своего чуднаго образа, всех нас на духовное веселие созывающи. Одевает бо нагия и просвещает темныя, питает алчущия и напаяет жаждущия, и всем просящим дает полезная. Катавасия.

Песнь 6. Ирмос

Божественое се и всечестное совершающе празднество богомудрении Божия Матере. Приидите руками восплещем, от Нея Рождьшагося верою славяще.

Запев. Божественое есть зело честное торжество Божия Матере, созывающи на веселие верныя. Обновляет бо ся всяк приступаяи с верою, скверны бо Та всякия чистительна есть. Священницы в правду вси облецытеся, и преподобнии возрадуйтеся, мужи и жены, юноши и девы возвеселитеся, и вси раби Бога нашего воспойте. Почтем Чистую в чистоте Богородицу, подает бо нам неизреченныя Своея милости.

Запев. Божественая и Ангелом говеимая икона Твоя Богородице, прииде к нам за крайнее Твое человеколюбие, неизреченныя дары всем подавающи. Но о, преблагаго Бога Мати, умоли Свое Рождение, всем нам полезное дати, избавитися лютых. Глада же и мора, и сопротивнаго нахождения, и воднаго истопления, труса и озлобления, от тлетворных ветров. Ты бо еси готовая помощница, и неложная наша всем верным заступница.

Слава. Божественое и чудное явление Божия Матере, дивное Пречистыя образа Ея пришествие, горе удивляет Ангелы, доле же созывает род человеческии, единогласно вопити: слава Христу Богу, благоизволившему таковое неизреченное сокровище нам объявити, и милость удивити, и пламении огня невредиму сохранити. Но о, Божия дарования даровася, Ея же молитвами Христе, спаси душа наша, яко Милосерд.

И ныне. Божественаго Твоего чуднаго образа явление Богородице Владычице, всем верным свет восия. Мертвым живот, слепым свет. Глухим слышание, немым глаголание. Разслабленным здравие, прокаженным очищение, беснующимся целомудрие. Младенческое воспитание, вдовицам и сиротам промышление. Неплодным женам разрешение, плодоносящим неболезненое рождение. Девическая чистота, и воздержание всем, в нуждах скорая помощница. Молим Ти ся, помилуй нас. Катавасия.

Слава, и ныне. Кондак, глас 8-й. Притецем людие вси к тихому и доброму пристанищу, в Дом Божия Матере чуднаго образа явлению Царицы и Богородицы. За неизреченную милость Ея, верно припадающе и вопиюще: о, всемилостивая Владычице, за спасительное Твое смотрение чуднаго образа к нам пришествие, посети нас грешных, светло сотворяющих празднество Твое. Укрепи людей наших, дивно им на враги победу подающи. И архиерея нашего утверди, Церковь Сына Твоего непоколебиму соблюди. Притекающих к Тебе спаси, от всяких напастей избави: сохраняя в мире все православие, да зовем Ти, радуися Невесто неневестная.

Икос. Пречуднаго Царицына образа к нам пришедшаго видяще, на высоту добродетелей вознесемся, ум преложьше на Небо. Ея же ради Вышнии на земли явися, хотя привлещи к высоте вопиющих Ей: радуися благословенная Дево от всех родов Богоизбранная. Радуися небесная Царица Мати Господа Бога Творца всех. Радуися всерадостное Ангельское немолчное пение. Радуися всегда желательное и несытное человеческое зрение. Радуися крепкое веры обновление. Радуися истинное веры познание. Радуися небесных со земными соединившая. Радуися земных к Богу присвоение. Радуися печальным душам утешение. Радуися больным посещение, и прокаженным очищение. Радуися глухим слышание, и хромым хождение. Радуися узником свобождение, и грешным прощение. Радуися алчущим кормительница, и нагим одеяние. Радуися странным путь водительныи, и обуреваемым пристанище. Радуися старости жезл, и сиротам промышление. Радуися младенческое воспитание, и девствующим целомудрие. Радуися всех родов веселие, и всем християном поможение и заступление. Их же соблюдай от всех бед, да зовем Ти, радуися Невесто неневестная.

Песнь 7. Ирмос

Не послужиша твари богомудреннии паче Зиждителя. Но огненное прещение мужески поправше, радовахуся поюще, препетыи иже отцем Господь и Бог благословен еси.

Запев. Не послужиша твари паче Творца, богомудреннии народи российстии. Но приидите почтем чистую в чистоте Божия Матере икону, воздевше руце на высоту, вопием Ей: о, преблагословенная в женах Дево Божие жилище, християном помощь и заступление, правоверных и покланяющихся Твоей чудотворней иконе всем полезная подающи (поклон).

Запев. Небеснии чинове со земными веселятся, во светлое торжество явления Божия Матере иконы. Нас же предстоящих просвети Пресвятая, светом Твоея милости. Умоли Свое Рождение, подати людем нашим на враги побеждение. И всем верным помощь и одоление, и от всех навет свобождение, и грехов оставление, и душам спасение даровати молимся.

Слава. Небо и земля днесь пророчески да возвеселятся, Ангели и человецы духовно да торжествуют, и вся тварь да поет Господеви, песнь немолчную сотворшему вся, и почитающе священное торжество Божия Матере, чуднаго образа явление. О, паче ума чудес Твоих Господи, яже сотворил еси, на Тя надеющимся. Стену и помощь необориму людем Своим даровал еси, образ Матере Своея, Ея же мы почитающе вопием: радуися всеблагословенная Богородице чистая присно Дево.

И ныне. Ныне наста время освящая нас, и очищение подающи. Обремененным грехи многими, Мати Бога Вышняго, дивным пришествием пречистаго Своего образа, всем полезная подает, и вся спасает. О, ленивии, бодренно станите, и спящии от сна востаните. И разслабленныя удеса укрепите, к целбоносному источнику усердно притецыте. Поклоняемся чудней иконе Божия Матере, и почитаем ея раболепно (поклон): не поклоняющихся бо омрачает, и не почитающих погубляет. И покланяющихся и чтущих избавляет от великих бед и зол, благонравныя и богобоящияся рабы Своя. Катавасия.

Песнь 8. Ирмос

Отроки благочестивыя в пещи, рожество Богородиче спасло есть. Тогда убо образуемо, ныне же действуемо. Вселенную всю воздвиже пети, Господа воспевайте дела, и превозносите Его во веки.

Запев. О, преславных чудес Твоих пречистая Дево. Кто по достоянию похвалити возможет днесь, или воспети преславная Твоя величия. Днесь бо радости вся исполнила еси, вышняя и нижняя. Явлением чудныя Твоея иконы, верным явися сокровище неоскудное, и преславных роди вси просветишася, басурманския и еретическия козни вси посрамишася. Бегают же роди черныя, не смеют взирати на силу Твою. Нас же верных всех помилуй и спаси Владычице.

Запев. Пресвятая Дево Богородице, и Небесная Царица, Мати Христа Бога и Царя всех. Вышши еси всех Ангел и Архангел, и всея твари честнейши. Помощница еси обидимым, и ненадеющимся надежда. Печальным утешение, и всем в нуждах скорая Помощница, твердое наше ограждение. Что принесем Твоему величеству, или како похвалим недостойнии; но точию радуися наш Живот и Воскресение, всех нас помилуй Благословенная.

Слава. Великое наше заступление и похвало. Радость наша и веселие Пресвятая Богородице. Християнский щит, и оружие на враги. Крепость наша и заступление. Кто притекая к Тебе, и посрамлен от Тебе исходит. Или призывая Тя, не услышан бывает. Или прося от Тебе что, не приемлет. Ничтоже бо не невозможно ходатайству Твоему. Но о, Всепетая молим Ти ся Пречистая: источниче присно текущии, исцели немощи наша, рабом Твоим.

И ныне. О, дивная наша похвало, пастырю наш добрыи, и учителю наш премудрыи. Небесныя премудрости исполнена Пресвятая Богородице, приими моление наше раб Своих, исполни радости вся православныя. Не имамы бо иныя помощи кроме Тебе, на Тебе бо надеемся, и Тобою хвалимся всегда, Ты бо еси нелетное наше пристанище. Помилуй сродное Твое достояние, подаждь утешение всем, полезное рабом Своим. Катавасия.

Песнь 9. Ирмос

Всяк земен да взыграется, Духом просвещаемь. Да ликовствует же безплотных умов естество, почитая святое торжество Божия Матере, и да поет, радуися преблаженная Богородице чистая присно Дево.

Запев с поклоном. Всяк земнородныи, поистине да взыграется Духом просвещаем. Но кто от человек не почудится преславному Божия Матери явлению. Никто же буди уныл. Отложивше сетование, в радость облецытеся вси, приидите на видение преславнаго чудесе. Како прииде к нам Заступница рода нашего, о, чудесе новаго. Ея же ради Христе Боже, спаси душа наша яко Милосерд.

Запев. Всяк род, небесных и земных и преисподних, да поклонится и поет. Всяк язык исповесть, яко воистину чудо преславно Божия Матере. О, всепетая чистая Пресвятая Владычице, в милости скорая помощница, призри оком Своим Милосердая, и избави рабы Своя, Тебе призывающия, от лютых болезней, и стрел лукаваго. Величия бо Твоя кто исповесть; всем бо требующим точиши чудеса, и изливаеши исцеление, и молишися за душа наша, яко сыи милостивая всем Заступница.

Слава. Воспоем вси вернии песнь Господню Божии Матери, созывающе на пение, вся чины небесныя: Ангелов и Архангелов, пророков и апостолов, иерархов и мучеников, преподобных и праведных, и всех святых Божиих угодников, сотворити молитву со Царицею ко Господу. Плач рабов Своих обратити на веселие, и исцелити болезни тяжкия, и подати вместо печали веселие. О, крепкая наша Помощница, всем печальным утешение, вонми молению раб Твоих, и спаси Тебе величающих.

И ныне. О, всепетая Мати благословенная, рождьшая всех святых святейшая, Слово Христа нашего, нынешнее приношение приими, от недостойных устен приносимое, бренною рукою сотворенное. Никако же достоин на сие Владычице, но надеяся на Твоя щедроты и милосердие, препростое пение принесох Ти Всепетая. Всем Спасителя всех родила еси, нас ради на землю сошедшаго. Не возгнушайся Дево непотребнаго, приими Царице сие, и помилуй мя. Катавасия.

Задостойник: Владычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.

Отпуст: Господи Исусе Христе Сыне Божии, молитв ради пречистыя Твоея Матере, честнаго и славнаго явления чудотворныя иконы Ея Феодоровския, и всех ради святых, помилуй и спаси нас, яко Благ и Человеколюбец. Аминь.

Конда́к 1.

Взбра́нной Воево́де, Пренепоро́чней Де́ве Богоро́дице, Засту́пнице на́шей и Предста́тельству христиа́н непосты́дному, явле́нием чу́дныя ико́ны Своея́ ра́дование пода́вшей земле́ Росси́йстей и вся́ ве́рныя ча́да Це́ркве просвети́вшей, благодаре́ние усе́рдно прино́сим Ти́, Богоро́дице, и припа́дающе пречу́дному о́бразу Твоему́, уми́льно глаго́лем: спаси́, Госпоже́, и поми́луй рабы́ Твоя́, зову́щия:

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

И́кос 1.

Арха́нгел Гаврии́л от Бо́га по́слан бы́сть во гра́д Назаре́т ко Пречи́стей Де́ве Мари́и, и вше́д к Не́й рече́: Ра́дуйся, Благода́тная, Госпо́дь с Тобо́ю, благослове́нна Ты́ в жена́х. Арха́нгельскому гла́су подража́юще, и мы́, гре́шнии, ра́дости и благодаре́ния в се́рдце свое́м испо́лнени, пред явле́нным о́бразом Твои́м благохвале́ния на́ша возноси́ти к Тебе́ дерза́ем, Пресвята́я Богоро́дице:

Ра́дуйся, о́трасле от ко́рене Дави́дова благослове́нная; ра́дуйся, обе́том роди́телей в же́ртву Бо́гу принесе́нная.

Ра́дуйся, святы́х пра́ведных Иоаки́ма и А́нны Дщи́ Богода́нная; ра́дуйся, трие́х ле́т во хра́м Бо́жий введе́нная и та́мо воспита́нная.

Ра́дуйся, та́мо смире́нием и чистото́ю все́х удиви́вшая; ра́дуйся, та́мо арха́нгельския бесе́ды сподо́бльшаяся.

Ра́дуйся, Де́во, о зача́тии Бо́га Сло́ва благове́стие во смире́нии прие́мшая; ра́дуйся, избра́нная Отрокови́це, к зача́тию Бо́га Сло́ва си́лою свы́ше осене́нная.

Ра́дуйся, та́йну воплоще́ния Сы́на Бо́жия, от веко́в в Бо́зе сокрове́нную, откры́вшая; ра́дуйся, А́гнице, ро́ждшая А́гнца Христа́, взе́мшаго грехи́ ми́ра.

Ра́дуйся, Тобо́ю бо избавля́емся му́к а́довых; ра́дуйся, Тобо́ю бо сподобля́емся ве́чныя жи́зни.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 2.

Ви́дя ико́ну Твою́, Пресвята́я Де́во, на дре́ве стоя́щу, кня́зь благочести́вый Костромски́й у́жасом мно́гим содрога́шеся недоуме́я, что́ бы́сть виде́ние сие́. Хотя́щу же ему́ прия́ти ю́ и от сего́ свы́ше уде́ржану ему́ бы́вшу, не можа́ше; уве́дев, я́ко чу́дно е́сть ико́ны тоя́ явле́ние, воззва́ к Бо́гу: Аллилу́иа.

И́кос 2.

Ра́зумом жела́я разуме́ти кня́зь благочести́вый прише́ствие пречу́днаго Твоего́ о́браза во гра́д Кострому́, Богоро́дице, душе́ю ра́дования преиспо́лненною себе́ предаде́ води́тельству Бо́жию, и прекло́нь коле́на, со стра́хом вопия́ше Тебе́:

Ра́дуйся, Де́во, я́вльшая о́браз Сво́й чу́дно; ра́дуйся, Благослове́нная, в явле́нии о́браза Своего́ милосе́рдие на́м явля́ющая.

Ра́дуйся, о все́х чту́щих Сы́на Твоего́ промышля́ющая; ра́дуйся, все́м прося́щим у Тебе́ да́ры, в ме́ру ве́ры, ко спасе́нию подаю́щая.

Ра́дуйся, пу́ть и́стины заблу́ждшим показу́ющая; ра́дуйся, к го́рнему ми́ру чудесы́ Твои́ми у́м на́ш возводя́щая.

Ра́дуйся, смуще́ния помышле́ний сумни́тельных удаля́ющая; ра́дуйся, сла́вящих Тя́ всегда́ прославля́ющая.

Ра́дуйся, чистото́ю Твое́ю чистоте́ на́с науча́ющая; ра́дуйся, чистото́ю Твое́ю нечистоту́ на́шу облича́ющая.

Ра́дуйся, моле́ния на́ша прие́млющая; ра́дуйся, рыда́ний и сле́з не отмета́ющая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 3.

Си́лу Бо́жию благочести́вый кня́зь позна́в в восхожде́нии о́браза чу́днаго Твоего́, Богома́ти, в явле́нии же ви́дев милосе́рдие Твое́ ко все́м спасе́ние хотя́щим получи́ти, рече́: Аллилу́иа.

И́кос 3.

Име́в по́мысл стяжа́ти да́руемое Небе́сное сокро́вище, ли́к Тво́й све́тлый, Богома́ти, второ́е простре́ держа́вный ру́ку к о́бразу нисше́дшему; узре́в же па́ки его́ восхожде́ние, ско́ро по́йде во гра́д и пове́да о бы́вших ему́ освяще́нному собо́ру, да прише́дше и ви́дяще ико́ны Твоея́ явле́ние возопию́т с ни́м ве́рнии:

Ра́дуйся, Цари́це Небесе́ и земли́; ра́дуйся, Престо́ле Царя́ ца́рствующих.

Ра́дуйся, Пренепоро́чная Де́во; ра́дуйся, Ма́ти Непристу́пнаго Све́та.

Ра́дуйся, честне́йшая Херуви́м; ра́дуйся, сла́внейшая без сравне́ния Серафи́м.

Ра́дуйся, Небе́сными Си́лами велича́емая; ра́дуйся, от все́х земноро́дных ублажа́емая.

Ра́дуйся, неизрече́нное Весе́лие А́нгелов; ра́дуйся, Ве́нче ца́рственный все́х проро́ков и апо́столов.

Ра́дуйся, правосла́вия Христо́вы Це́ркве огражде́ние; ра́дуйся, все́х суему́дрых уче́ний и ересе́й низложе́ние.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 4.

Бу́рю вну́трь име́я помышле́ний недоуме́нных, освяще́нный собо́р со псалмы́ и пе́сньми духо́вными а́бие притече́ ви́дети о́браз Тво́й, Неискусобра́чная. Узре́в же его́ на дре́ве ди́вно стоя́ща и благоле́пно красото́ю сия́юща, рече́: Аллилу́иа.

И́кос 4.

Слы́шаша лю́дие честны́я ико́ны Твоея́, Богоотрокови́це, прише́ствие и, ко о́ной те́кше, поклоня́хуся, а́ки Саме́й Тебе́ су́щей, и со умиле́нием и слеза́ми вопия́ху к Тебе́:

Ра́дуйся, Де́во, Благослове́нная в жена́х, во чре́ве Твое́м Носи́теля вся́ческих носи́вшая; ра́дуйся, рожде́нием Сы́на Твоего́ спасе́ние ми́ру всему́ я́вльшая.

Ра́дуйся, челове́ки с Бо́гом соедини́вшая; ра́дуйся, превы́шшая небе́с, изба́вльшая на́с от кля́твы.

Ра́дуйся, на́с к ве́чной жи́зни руководя́щая; ра́дуйся, Влады́чице ми́ра.

Ра́дуйся, Бо́жие к сме́ртным благоволе́ние; ра́дуйся, сме́ртных к Бо́гу дерзнове́ние.

Ра́дуйся, благи́х во бла́гости соблюда́ющая; ра́дуйся, лука́вых на пу́ть благи́й обраща́ющая.

Ра́дуйся, под се́нь кро́ва Твоего́ прибега́ющих ми́лующая; ра́дуйся, упова́ющим на Тя́ вся́ потре́бная к животу́ и благоче́стию да́рующая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 5.

Я́ко боготе́чную звезду́ узре́ша лю́дие ико́ну Твою́, Безневе́стная Де́во, и, я́ко многосве́тлый свети́льник, поста́виша ю́ во святе́м собо́рнем хра́ме, ра́дующеся и вопию́ще Бо́гу: Аллилу́иа.

И́кос 5.

Ви́девше жи́телие гра́да Городца́ о́браз Тво́й, Влады́чице, во хра́ме гра́да Костромы́ стоя́щий, и на руку́ Твое́ю держи́ма Богомладе́нца Иису́са, ско́рбию одержи́ми бе́ша, зане́ отше́ствие его́ бы́сть из гра́да и́х. Мы́ же, обра́довани благоволе́нием Твои́м ко гра́ду на́шему, прино́сим Ти́ да́ры, и, с любо́вию лобыза́юще Тво́й святы́й о́браз, вопие́м Ти́:

Ра́дуйся, Звездо́, Со́лнце пра́вды на́м я́вльшая; ра́дуйся, возлюби́вшая сию́ страну́.

Ра́дуйся, обре́тение Тебе́ и́щущих; ра́дуйся, ра́достию неизрече́нною ве́рных сердца́ исполня́ющая.

Ра́дуйся, сокро́вище благода́ти неистощи́мое; ра́дуйся, ми́лости приснотеку́щий исто́чниче.

Ра́дуйся, от тя́жких бе́д спаса́ющая; ра́дуйся, от смертоно́сныя я́звы избавля́ющая.

Ра́дуйся, всего́ ми́ра Хода́таице; ра́дуйся, все́х неду́гующих Цели́тельнице.

Ра́дуйся, Красото́ несравне́нная; ра́дуйся, Добро́то несказа́нная.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 6.

Пропове́дницы богоно́снии бы́ша ви́девшии о́браз Тво́й, Богоро́дице. Возвра́щся бо ки́йждо во страну́ свою́, возвеща́ше о прише́ствии его́ и чудесе́х от него́ быва́емых, воспева́я Бо́гу: Аллилу́иа.

И́кос 6.

Возсия́вша благода́ть от чу́днаго о́браза Твоего́, Чи́стая, ве́ру немощству́ющих утверди́, ве́рных же возвесели́ сердца́ любо́вию. Сего́ ра́ди ра́дующеся вопие́м Ти́:

Ра́дуйся, Пресвята́я Де́во, све́том Небе́сныя и́стины на́с озаря́ющая; ра́дуйся, мглу́ грехо́вную от на́с отгоня́ющая.

Ра́дуйся, чудесы́ Твои́ми к богове́дению на́с приводя́щая; ра́дуйся, все́х ка́ющихся гре́шников ко благоче́стию подвиза́ющая.

Ра́дуйся, все́х притека́ющих к Тебе́ кре́пкое заступле́ние; ра́дуйся, немощству́ющих умо́м утвержде́ние.

Ра́дуйся, изнемога́ющих в ве́ре возставля́ющая; ра́дуйся, ти́хое приста́нище в мо́ре жите́йстем обурева́емым.

Ра́дуйся, злы́я сове́ты сыно́в поги́бельных открыва́ющая; ра́дуйся, вознесе́нную горды́ню враго́в оте́чества на́шего смиря́ющая.

Ра́дуйся, правосла́вных царе́й Держа́во; ра́дуйся, все́х христиа́н Похвало́.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 7.

Хотя́ просла́вити Сы́н Тво́й, Богоро́дице, святу́ю ико́ну Твою́ во гра́де Костроме́, повеле́ ю́ в де́нь Успе́ния Твоего́ свято́му великому́ченику Фео́дору Стратила́ту носи́ти по гра́ду сему́, да вси́, ви́дяще чу́до сие́, благода́рным се́рдцем возопию́т Ему́: Аллилу́иа.

И́кос 7.

Чу́до но́вое яви́ на́м Госпо́дь мольба́ми Твои́ми, Богоро́дице, егда́ сгоре́вшу хра́му, в не́мже бе́ поста́влен святы́й о́браз Тво́й, сохрани́ его́ в пе́пле невреди́ма от огня́, и та́ко мне́вших сгоре́вша его́ печа́ль в ра́дость преложи́. Мы́ же, чу́до сие́ ве́дяще, воспева́ем Ти́ такова́я:

Ра́дуйся, Купино́ Неопали́мая; ра́дуйся, о́гненный сто́лпе, су́щия во тьме́ наставля́яй.

Ра́дуйся, Киво́те, Ду́хом позлаще́нный, Невмести́маго Бо́га вмести́вший; ра́дуйся, кади́льнице злата́я, я́ко фимиа́м благоуха́нный, моли́твы Твоя́ за ны́ к Бо́гу Сы́ну при́сно вознося́щая.

Ра́дуйся, Же́зле Ааро́нов, к явле́нию в ми́р Сы́на Твоего́ прозя́бший; ра́дуйся, Руно́ Гедео́ново, благода́тию Бо́жиею во спасе́ние на́ше ороше́нное.

Ра́дуйся, Горо́ несеко́мая, от Нея́же отсече́ся краеуго́льный ка́мень Христо́с; ра́дуйся, Хра́ме одушевле́нный, в Не́мже всели́ся Божество́ теле́сне.

Ра́дуйся, де́вства охране́ние; ра́дуйся, супру́жества благослове́ние.

Ра́дуйся, па́че все́х Го́спода возлюби́вшая; ра́дуйся, па́че все́х от Него́ превознесе́нная.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 8.

Стра́нное чу́до ви́девше, на возду́се ико́ну Богома́тери стоя́щу, а́ки рука́ми а́нгельскими держи́му, егда́ второ́е сгоре́ хра́м, в не́мже стоя́ше явле́нная сия́ ико́на, отве́ржемся, лю́дие, ми́ра сего́, у́м на Небеса́ прело́жше; сего́ бо ра́ди и даде́ся на́м чу́дная ико́на Богоро́дицы, да, взира́юще на ню́, Го́рняя му́дрствуем, а не земна́я, вопию́ще к Бо́гу: Аллилу́иа.

И́кос 8.

В вы́шних пребыва́ющи селе́ниих, и ни́жних не разлучи́лася еси́, Богоро́дице, чудесы́ Твои́ми все́х просвеща́ющи приходя́щих к Тебе́ с ве́рою, сего́ ра́ди и слы́шиши от на́с сия́:

Ра́дуйся, Ма́ти Христа́ Бо́га на́шего, на Небеси́ пребыва́ющая; ра́дуйся, на земли́ на́с не оставля́ющая.

Ра́дуйся, ра́ди вели́чества Твоего́ на Небеси́ А́нгелы окруже́нная; ра́дуйся, ра́ди сла́вы Твоея́ на земли́ от челове́к прославля́емая.

Ра́дуйся, Тебе́ бо слу́жат вся́ Небе́сныя Си́лы; ра́дуйся, Тебе́ бо, по Бо́зе, хвале́ние возно́сят Херуви́ми и Серафи́ми.

Ра́дуйся, лице́ Бо́жие вы́ну на Небеси́ созерца́ющая; ра́дуйся, пред престо́лом Сы́на Твоего́ Ма́терния ру́це Твои́, за ны́ моля́щися, простира́ющая.

Ра́дуйся, на́с, су́щих на земли́, от вся́каго зла́ омофо́ром Твои́м покрыва́ющая; ра́дуйся, ве́рных от вся́ких душепа́губных де́л удаля́ющая.

Ра́дуйся, рожде́нием Сы́на Бо́жия две́ри Ца́рства Христо́ва на́м отве́рзшая; ра́дуйся, наде́ждою прия́ти Небе́сных бла́г ве́рных ду́ши услажда́ющая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 9.

Вся́кое естество́ а́нгельское превозно́сит Тя́, Де́во, вели́кия ра́ди любве́ Твоея́ к ро́ду христиа́нскому; незри́ма бо и непристу́пна, я́ко Ма́ти Бо́га от земли́ к Небеси́ возше́дшая, пречи́стым Твои́м о́бразом зри́му и присту́пну Себе́ явля́еши все́м воспева́ющим Сы́ну Твоему́: Аллилу́иа.

И́кос 9.

Вети́я многовеща́нныя, я́ко ры́бы безгла́сны, зри́м о Тебе́, Богоро́дице, недоуме́ют бо глаго́лати о сла́вных чудесе́х, от явле́нныя Твоея́ ико́ны быва́емых. Мы́ же о́ным дивя́щеся благода́рно вопие́м Ти́:

Ра́дуйся, слепы́х прозре́ние; ра́дуйся, хромы́х хожде́ние.

Ра́дуйся, от те́мных и лука́вых духо́в исцеля́ющая; ра́дуйся, луча́ми от Твоего́ пречи́стаго о́браза изше́дшими враго́в земли́ на́шея отгна́вшая.

Ра́дуйся, больны́м виде́ние Твое́ дарова́вшая; ра́дуйся, моля́щимся явле́нней ико́не Твое́й исцеле́ние подаю́щая.

Ра́дуйся, разсла́бленных от одра́ боле́зни воздвига́ющая; ра́дуйся, немы́м разреша́ющая уста́.

Ра́дуйся, от пле́на вра́жия возвраща́ющая; ра́дуйся, лю́тыя пло́ти стра́сти утоля́ющая.

Ра́дуйся, ду́ши ве́рных неизрече́нным милосе́рдием Твои́м умиля́ющая; ра́дуйся, неизглаго́ланным Твои́м человеколю́бием уныва́ющих ободря́ющая.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 10.

Соблюсти́ хотя́щи в чистоте́ домострои́тельство Це́ркве Правосла́вныя, Чи́стая, и, утверди́ти ски́петр держа́вы Росси́йския, чу́дною ико́ною Твое́ю вложи́ла еси́ в се́рдце благове́рнаго госуда́ря Михаи́ла Фео́доровича прия́ти вене́ц ца́рский земли́ Росси́йския, да вси́ ви́дящии ви́дят, я́ко Вы́шний владе́ет ца́рством, и ему́же хо́щет дае́т е́, и возопию́т Ему́: Аллилу́иа.

И́кос 10.

Стена́ еси́ необори́мая, Богоро́дице Де́во, все́м к Тебе́ прибега́ющим: никто́же бо притека́яй к Тебе́ то́щ отхо́дит. Сего́ ра́ди ущедря́еми ми́лостию Твое́ю, во умиле́нии души́ возглаша́ем Тебе́:

Ра́дуйся, тве́рдая Стено́, от вра́г ви́димых и неви́димых охраня́ющая; ра́дуйся, кре́пкая Защи́то упова́ние на Тя́ возложи́вшим.

Ра́дуйся, позна́ния и́стины чи́стое Зерца́ло; ра́дуйся, сохране́ния ве́ры кре́пкое Забра́ло.

Ра́дуйся, гра́ды и страны́ христиа́нския предста́тельством Твои́м от враго́в спаса́ющая; ра́дуйся, царе́м благове́рным побора́ющая.

Ра́дуйся, ми́р во гра́дех селя́щая; ра́дуйся, благонра́вным благопоспеша́ющая.

Ра́дуйся, си́лою моли́тв Твои́х злы́я по́мыслы в ничто́же обраща́ющая; ра́дуйся, си́лы враго́в бли́жняго сокруша́ющая.

Ра́дуйся, ю́ности наставле́ние; ра́дуйся ста́рости поддержа́ние.

Ра́дуйся Ма́ти Бо́жия, Предста́тельнице и Засту́пнице на́ша усе́рдная.

Конда́к 11.

Пе́ние вся́кое побежда́ется спростре́тися тща́щееся ко мно́жеству мно́гих щедро́т Твои́х; равночи́сленныя бо песку́ морско́му пе́сни а́ще прино́сим Ти́, Богоро́дице Де́во, ничто́же соверша́ем досто́йно, я́же дарова́ла еси́ на́м, вопию́щим к Бо́гу: Аллилу́иа.

И́кос 11.

Светоприе́мную свещу́, дре́вле я́вльшуюся, зри́м во святе́й ико́не Твое́й, Богоро́дице Де́во, егда́ гра́д на́ш защити́ла еси́ от разоре́ния враго́в земли́ на́шея луча́ми, от святы́я Твоея́ ико́ны исходя́щими. Сего́ ра́ди с ве́рою припа́дающе к не́й и с любо́вию лобыза́юще ю́, вопие́м Ти́:

Ра́дуйся, Ма́ти Преве́чнаго Све́та Христа́, уче́нием Его́ ду́ши просвеща́ющая; ра́дуйся, благода́тию Бо́жиею неве́рующих к ве́ре в Бо́га приводя́щая.

Ра́дуйся, путеше́ствующим спутеше́ствующая; ра́дуйся, ну́ждно пла́вающих Ко́рмчая.

Ра́дуйся, от вся́кия ско́рби, гне́ва и ну́жды спаса́ющая; ра́дуйся, от гла́да, губи́тельства, тру́са и огня́ сохраня́ющая.

Ра́дуйся, избавля́ющая от иноплеме́нных; ра́дуйся, охраня́ющая от междоусо́бныя бра́ни.

Ра́дуйся, во святе́й ико́не Твое́й, я́ко со́лнце, в Костромски́х преде́лех возсия́вшая; ра́дуйся, зде́ о́трасль ца́рственную возвели́чившая.

Ра́дуйся, Тобо́ю бо утвержда́ются ца́рства; ра́дуйся, Тобо́ю бо венча́ются ца́рие.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 12.

Благода́ть прия́вшая от Бо́га Сы́на Твоего́, Де́во Богоро́дице, и ту́ дре́вле излия́вшая на все́х прибега́ющих к о́бразу Твоему́, не лиши́ ны́не и на́с бога́тыя Твоея́ ми́лости, да́руй на́м покая́ние о гресе́х, да чи́стым се́рдцем и устны́ взыва́ем к возлю́бленному Сы́ну Твоему́ и Бо́гу на́шему: Аллилу́иа.

И́кос 12.

Пою́ще Твоя́ ми́лости и чудеса́, хва́лим Тя́ вси́, Богоро́дице, и, я́ко дре́вле Изра́иль к киво́ту Заве́та, притека́ем ко о́бразу лица́ Твоего́, и из глубины́ души́ вопие́м: воздви́гни ру́це Твоя́ к Сы́ну Твоему́, да пода́ст на́м вся́ блага́я и спаси́тельная с ве́рою и любо́вию вопию́щим Ти́:

Ра́дуйся, Утеше́ние на́ше в ско́рбех; ра́дуйся, Утоле́ние печа́лей на́ших.

Ра́дуйся, Ра́досте на́ша безконе́чная; ра́дуйся, Све́тлосте и Отра́до серде́чная.

Ра́дуйся, Наде́ждо на́ша кре́пкая; ра́дуйся, си́рым Прия́телище.

Ра́дуйся, стра́нным Прибе́жище; ра́дуйся, оби́димым Покрови́тельнице.

Ра́дуйся, оклевета́емых Оправда́ние; ра́дуйся, благи́х Защище́ние.

Ра́дуйся, те́ла моего́ Врачева́ние; ра́дуйся, души́ моея́ Спасе́ние.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 13.

О Премилосе́рдая Засту́пнице на́ша, вели́кия ра́ди ми́лости Твоея́ дарова́вшая оте́честву и гра́ду на́шему чудотво́рную ико́ну Твою́ во освяще́ние, утеше́ние и огражде́ние на́ше, ны́нешнее прие́мши славосло́вие, от вся́каго зла́го обстоя́ния изба́ви на́с, ра́б Твои́х, да́руя на́м здра́вие и спасе́ние, на враги́ побе́ду и одоле́ние и все́х на́с ве́чных му́к свободи́, устна́ми, душе́ю же и се́рдцем вопию́щих: Аллилу́иа.

Этот конда́к читается трижды, затем 1-й и́кос и 1-й конда́к.

И́кос 1.

Арха́нгел Гаврии́л от Бо́га по́слан бы́сть во гра́д Назаре́т ко Пречи́стей Де́ве Мари́и, и вше́д к Не́й рече́: Ра́дуйся, Благода́тная, Госпо́дь с Тобо́ю, благослове́нна Ты́ в жена́х. Арха́нгельскому гла́су подража́юще, и мы́, гре́шнии, ра́дости и благодаре́ния в се́рдце свое́м испо́лнени, пред явле́нным о́бразом Твои́м благохвале́ния на́ша возноси́ти к Тебе́ дерза́ем, Пресвята́я Богоро́дице:

Ра́дуйся, о́трасле от ко́рене Дави́дова благослове́нная; ра́дуйся, обе́том роди́телей в же́ртву Бо́гу принесе́нная.

Ра́дуйся, святы́х пра́ведных Иоаки́ма и А́нны Дщи́ Богода́нная; ра́дуйся, трие́х ле́т во хра́м Бо́жий введе́нная и та́мо воспита́нная.

Ра́дуйся, та́мо смире́нием и чистото́ю все́х удиви́вшая; ра́дуйся, та́мо арха́нгельския бесе́ды сподо́бльшаяся.

Ра́дуйся, Де́во, о зача́тии Бо́га Сло́ва благове́стие во смире́нии прие́мшая; ра́дуйся, избра́нная Отрокови́це, к зача́тию Бо́га Сло́ва си́лою свы́ше осене́нная.

Ра́дуйся, та́йну воплоще́ния Сы́на Бо́жия, от веко́в в Бо́зе сокрове́нную, откры́вшая; ра́дуйся, А́гнице, ро́ждшая А́гнца Христа́, взе́мшаго грехи́ ми́ра.

Ра́дуйся, Тобо́ю бо избавля́емся му́к а́довых; ра́дуйся, Тобо́ю бо сподобля́емся ве́чныя жи́зни.

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Конда́к 1.

Взбра́нной Воево́де, Пренепоро́чней Де́ве Богоро́дице, Засту́пнице на́шей и Предста́тельству христиа́н непосты́дному, явле́нием чу́дныя ико́ны Своея́ ра́дование пода́вшей земле́ Росси́йстей и вся́ ве́рныя ча́да Це́ркве просвети́вшей, благодаре́ние усе́рдно прино́сим Ти́, Богоро́дице, и припа́дающе пречу́дному о́бразу Твоему́, уми́льно глаго́лем: спаси́, Госпоже́, и поми́луй рабы́ Твоя́, зову́щия:

Ра́дуйся, Ма́ти Бо́жия, Предста́тельнице и Засту́пнице на́ша усе́рдная.

Автоматическое повторение Феодоровской молитвы не защитит,

не поможет выносить ребенка, исцелиться от недугов.